El Govierno Local de la Ciudad de Isabela bajo el liderato de Alcadeza Sitti Djalia Turabin-Hataman y por medio del Oficina del Turismo Local que ta encabeza el CTO Claudio Ramos II ya extende suporta na aca-126 Año Conmemoración de Terremoto, Septiembre 21, del Prelatura de Santa Isabel de Portugal.

Como expresion de unidad na maga fieles Catolico Isabeleño y reconocimiento del valor de este ocasion na identidad historical y cultural del ciudad, el Govierno Local ya participa na organizacion para na buen exito de este actividad religioso por medio de alquilar y decoracion del basnig donde ya munta el imagen de Santa Isabel de Portugal durante el procesion fluvial, el adquirir de maga flores que ya adorna con el catedral para na Santa Misa, el provision de tolda y maga silla para na maga devotos de edad y el preparacion del CDRRMO en tal caso de emergencia.

El Conmemoración de Terremoto ta honra el maga testimonia sobre el milagro que ya ocurri durante el fuerte terremoto o temblor del Septiembre 21, 1897 donde segun un mujer que ta semeja con Santa Isabel el ya para donde el aplaya del ciudad y ya demonstra para manda el muy alto marejada para man atras y entonces, salva con el Isabela y de este maga residente na calamidad. Presentamente, solamente el Ciudad de Isabela na entero Archipielago de Sulu el tiene este clase de procesion en la mar. (Por M. Guerrero/Retratos por KJ Evardo, CIO)

#HAPIsabela

#AHappyAndDignifiedLifeforAll