Ang National Learning Camp ay isang programang boluntaryo at komprehensibo sa pagpapahusay ng pag-aaral na layunin na mapabuti ang pagganap ng mga mag-aaral at palakasin ang kakayahan ng mga guro. Ito ay nagtagal ng mahigit isang buwan at nagdulot ng masayang karanasan sa pag-aaral at pagkakaisa sa mga dalawang daan at limampung mag-aaral mula sa iba’t ibang paaralan ng lungsod.

Sa pagtatapos ng National Learning Camp, nagbahagi ang BION Coordinator na si Patrina Turabin ng isang inspirasyonal na kwento sa mga nagtapos at naghatid ng inspirasyon at determinasyon.

Kasama rin sa okasyon si CIO Mendry-Ann Lim, na nagbigay ng maikling mensahe sa pagtatapos. Binati niya ang mga matagumpay na mag-aaral at mga guro na nagboluntaryo sa NLC ’23, dahil sa kanilang kontribusyon ay naging matagumpay ang programa. Ipinahayag niya ang kahalagahan ng pagbabasa at pagsusumikap, at inihikayat ang lahat na mahalin ang pagbabasa bilang simula ng pagkatuto.

Ang National Learning Camp 2023 ay nagpamalas ng husay at kakayahan ng mga mag-aaral na Isabeleño. Ipinakita ng mga mag-aaral ang kanilang talento, kahusayan, at potensyal. Ipinapahayag nila ang kanilang pagmamalaki sa paglahok at umaasang magagamit ang kanilang natutunan sa kanilang mga paaralan, komunidad, at sa mga darating na pagsubok ng buhay.

Kabilang sa mga dumalo ay sina Pangalawang Punongguro Melba Ramirez, Tagapamahala ng NLC Jian Franco Forzadao, iba pang mga guro ng ICEPS, at mga kawani mula sa Tanggapan ng Impormasyong Pampubliko. (Sulat ni K. Lim/Kuha ni A. Sali/CIO)