Ayon kay CTO Ramos II, ang paligsahan ay isang paraan ng pagsulong ng kulinarya bilang isang karanasan, kamalayang pang-turismo, at repleksyon ng pagkakakilanlan ng Isabeleño. Samantala, pinasalamatan naman ni Punong-Lungsod Sitti Djalia Turabin-Hataman ang lahat ng lumahok sa pagdiriwang at nagpahayag ng pananabik na tikman ang kanilang niluto, na karamihan ay binuo ng mga sangkap na makikita sa Lungsod ng Isabela.

Ang Master Chef Challenge ay nahahati sa dalawang kategorya: Sakayan Full Course Meal Preparation at ang Secret Recipe Challenge.

Ang unang kategorya ay nagbibigay-daan sa koponan na maghanda ng kumpletong handa mula sa pampagana o appetizer hanggang sa tatlong pangunahing handa, samantalang ang pangalawang hamon ay susuriin ang pamamahala ng oras at pagkamalikhain ng koponan habang naghahanda sila ng pagkain gamit ang mga biniling sangkap mula sa badyet ng mga tagapangasiwa ng patimpalak.

Ang nasabing paligsahan ay binubuo ng mga koponan mula sa bawat isa sa mga kalahok na barangay sa isang cluster. Nagsilbing bilang mga hurado sina PIA IX ARD Rene Carbayas, Atty. Danrie Duarte, DTI Development Specialist and Promotion Officer Sherin Francisco, City Health Officer Dr. Mohrein Ismael VI, at Executive Chef Ansary Cali. Nagpakita naman ng kanilang suporta ang ilang mga punong barangay na dumalo sa nasabing aktibidad. (Sulat ni SJ Asakil/Kuha nina KJ Evardo at M. Santos, CIO)